Постоиме.

Ги плетеме ли 

минатото,

сегашноста 

и иднината

во плетенка 

со три прамена

или се` е веќе 

одамна доживеано... ?

преживеано... ?

... па сме само сенки безвремени

кои си поигруваат одново и одново...

Како во круг си го цртаме времето,

напред и назад,

по желба,

со мали осцилации во изгледот, 

просторот,

допирот,

линијата...

а сепак основата иста...

чиста...

како првиот пат...

Дали постоиме сега и овде

заради сега и овде, (.?.)

или постоевме некогаш и негде

одамна...

за да се сретнеме сега и овде,

некаде...

на пола пат

сенки безвремени

со мали осцилации

во линијата...

а сепак основата иста....

чиста...

како првиот пат... 

И се` е како првиот пат...

сем она што не е...

Дали? ...

Не е ни важно...

Постоиме сега и овде,

од некогаш, 

некаде,

плетенка со три прамена

сплетена...

Постоиме.

Куфер

Живот во куфер спакуван

кутија со патент

распакуван

препакуван

сегде патник

сегде скитник

а никаде како дома

туѓа постела

туѓ кревет

туѓа туѓина

Ничкосан од умор

легнат во празна прегратка

на бели пердуви

и сон на ничија перница

никаде како дома

Од овде до онде

од онде кон непознаното

живот во куфер спакуван

распакуван

секаде патник

секаде скитник

секаде постела

ниедна дом